Ons geskiedenis, visie en missie:

Logos Baptiste Montana is ‘n herplanting van Montana Baptiste Kerk wat oorspronklik geplant is in 2000, deur oorlede dr. Martin Holt, in die kapel by Ilala Palm Lodge in dr. Swanepoel straat. Die gemeente kon na dr. Martin Holt se afsterwe in 2011 nooit blywend op sy voete kom nie. Die gemeente het egter besluit om te volhard ten spyte van die klein getalle.

Ds Driel Nel, is na ‘n paar jaar se hulpbediening aan die gemeente, beroep as herder en leraar in 2021. Tydens die Covid pandemie was daar lidmate wat moes verhuis o.a. weens werks afleggings en daar was lidmate wat oorlede is.

God is soewerein en getrou aan Sy Woord. Matteus 16:18 “Ek sal My kerk bou en die magte van die doderyk sal dit nie oorweldig nie”.

1 Johannes 5:14 “En  dit is die vrymoedigheid wat ons voor Hom het, dat Hy ons gebede verhoor as ons iets volgens Sy wil vra.

Ons Hemelse Vader het in so mate bewerk en voorsien dat die gemeente herplant is as Logos Baptiste Montana.

Die Heer het ook bewerk dat die gemeente kon verskuif na ‘n saal by Breinlyn, 215 Veronica straat, Montana, waar beter fasiliteite is en wat ook ‘n meer kinder-vriendelike omgewing is. Die gemeente het gegroei van vier na agt lidmate en ongeveer nege gereelde besoekers.

Ons volhard in gebede dat God mense sal toevoeg soos Hy wil. Ons glo dat die Bybel die enigste betroubare en genoegsame norm vir leer en lewe is. (Matteus 16:18) Die Heilige Skrif kan jou die kennis bybring wat tot verlossing lei deur die geloof in Jesus Christus. Die hele Skrif is deur God geïnspireer en het groot waarde om in die waarheid te onderrig. (2 Timoteus 3:15, 16)

2 Petrus 3:18 “Sorg dat julle aanhou groei in die genade en kennis van ons Here en Verlosser, Jesus Christus.”

Efesiers 4:12 “om die heiliges toe te rus vir hulle dienswerk om die liggaam van Christus op te bou”

Efesiers 4:15 “terwyl ons in liefde aan die waarheid vashou, in alle opsigte na Hom sal groei. Hy, Christus is die Hoof.

Ons glo dat die evangelie verkondiging die krag van God is waardeur die Heilige Gees oortuiging bewerk van wedergeboorte, bekering,
heiligmaking en volharding, in Christus.

Dit is dus Christus Jesus wat in die eerste plek by ons gepreek word. Hy is die hart van ons oortuigings, ons vreugde, ons vaste hoop, ons gebede, ons lofsange, ons liefde en omgee vir mekaar, ons evangelisasie en sending betrokkenheid.

Besoekers is hartlik welkom om by ons aan te sluit vir ons Sondae eredienste. Ons nooi u ook uit vir koffie, verversings en gesellige saam kuier na die erediens.

U is ook welkom om ons te kontak vir meer inligting i.v.m. ons kinderbediening, Jeug-en-Gesins bybelstudie en ons gebeds tye.