1.1 Om die drie-enige God : Vader, Seun en Heilige Gees, soos deur die Skrifte alleen voorgeskryf op beide individuele sowel as gesamentlike wyse te aanbid   en te verheerlik. (Eks. 20:3-6, Jud 1:20-21)

1.2 Om sondaars te evangeliseer; die geroepe heiliges in Christus in die allerheiligste geloof op te bou, en om die lewende liggaam van Christus op aarde te wees wat die volheid is van Hom wat alles in almal vervul. (Matt. 28 : 19; Jud. 1 : 20; Ef. 4 : 11 – 16; Kol. 1 : 18; Kol. 2 : 6-7; Ef. 1 : 22-23)

2. KENMERKENDE EIENSKAPPE (SOLA 5)

2.1 Die eer van God alleen (Rom. 11:33-36

2.2 Christus alleen (Hand. 4:12, 2 Joh. 1:9)

2.3 Die Skrif alleen. (2 Pet. 1:19-21, 2 Tim. 3:16-17)

2.4 Genade alleen (Ef. 2:8-9)

2.5 Geloof alleen (Rom. 5:1, Ef. 2:8-9)

3. GELOOFSBELYDENIS

3.1 Terwyl die Kerk die 1689 (London) Baptiste Belydenis (hierna die Belydenis genoem) as ‘n ware interpretasie van godsdienstige oortuigings, gebaseer op die Woord van God, handhaaf, word die Belydenis nie gesien as volledig of onfeilbaar nie. Deur by die belydenis te staan bedoel die Kerk ook nie om enigiets tot die eenvoudige voorwaardes van redding soos in die Skrif geopenbaar by te voeg nie. Saam met ander behoudende Protestantse gelowiges, onderskryf hierdie gemeente ook die volgende vier belydenis uitsprake.

 3.1.1 Ons glo in die absolute en finale gesag van die Ou en Nuwe Testament wat deur Goddelik geïnspireerde manne, onder die direkte lig en leiding van die Heilige Gees geskrywe is. Ons aanvaar dat die Bybel in geheel kanoniek foutloos en onfeilbaar is, en daarom dien as algehele en finale gesag vir geloof en lewe. (2 Tim. 3:16-17, 2 Pet. 1:19-21)

3.1.2 Ons glo in een God, die enigste en waaragtige – Vader, Seun en Heilige Gees, een Wese – drie Persone. (1 Pet. 1:2)

3.1.3 Ons glo in die Here Jesus Christus as die enigste gekruisigde, gestorwe en opgestaande Verlosser, die enigste Middelaar tussen God en mens- waarlik God en waarlik mens en erken Hom alleen as die Hoof van die Kerk, wat Sy liggaam op aarde is. (Kol. 1:18, Hand. 4:12, 1 Tim. 2:5, 1 Kor. 15:3-4)

3.1.4 Ons glo in die Heilige Gees, die onvervreembare gawe van God die Vader en die Here Jesus Christus aan Sy gemeente. Dit is Sy taak om die Here Jesus Christus te verheerlik, die gemeente te bou en toe te rus en die wêreld van sonde, geregtigheid en oordeel te oortuig. (Joh. 14-16)

4. GEMEENTE BEGINSELS

Saam met ander historiese behoudende Baptiste gemeentes erken ons die volgende beginsels.

4.1 Ons glo dat die lokale gemeente waarlik en volwaardige Kerk van Jesus Christus is. Dit is volkome selfstandig en bly dit selfs as dit vrywillig met ander gemeentes in vereniging tree. (1 Kor 1:2)

4.2 Ons glo dat die gemeente bestuur moet word onder die leiding van die Here Jesus Christus as hoof. Die ouderlinge wat onder die direkte gesag van Jesus Christus staan, sal in alle geestelike sake Skriftuurlike leiding neem en herderlik waak oor die geestelike welstand van die gemeente. Die ouderlinge sal, wanneer nodig gemeente vergaderings belê wanneer algemene gemeente belange ter sake kom. (Hand. 20:28)

4.3 Ons glo dat Christus slegs twee sakramente ingestel het, nl. die doop en die nagmaal.

4.3.1 Ons glo dat die doop ‘n instelling en opdrag is van Jesus Christus as teken en seël van dit wat Christus inwendig in ons siel/gees doen, nl. die afwassing van ons sondes deur Sy bloed. Daarom moet alle wedergebore volwassenes by getuienis van hulle wedergeboorte, geloof en bekering gedoop word. Die doop red dus nie, maar is ‘n teken van redding en is ‘n gelowige vereenselwiging met Sy sterwe en opstanding, dood vir die sonde en lewend vir Christus. (Hand 22:16, Mark 16:16, Rom. 6: 2-4, Kol 2:12)

4.3.2 Ons glo dat die Heilige Nagmaal die opdrag van die Here Jesus Christus aan Sy gemeente is en dat dit dien as die voortdurende herinnering aan Sy plaasvervangende sterwe aan die kruis in ons plek, totdat Hy weer kom. In die gebruik daarvan in die gemeentelike samekoms bevestig die Heilige Gees aan die ware gelowiges hulle eenheid met Christus en met mekaar. Die onveranderlike elemente van brood en wyn is die simboliese verteenwoordiging van die liggaam van Christus wat vir ons gebreek is en die bloed wat vir ons gevloei het as finale offer in ons plek om ons met God te versoen. (1 Kor. 11:23-32)

4.4 Ons glo dat die gelowige deel in die ampte van Christus as profeet, priester en koning. As profete verkondig ons Christus aan ongelowiges deur woord en daad, as priesters het ons direkte toegang tot die Vader deur Christus en tree ons deur voorbidding in by die Vader vir gelowiges, regerings en ongelowiges, en as konings word ons geroep om te heers oor die sonde. (1 Pet. 2:9, Open. 1:6)

4.5 Ons glo in die afsondering tussen die kerk en die staat deurdat, in die voorsienigheid van God die twee in hulle respektiewelike aard en funksie verskil. Die kerk kan nie met die staat geÏdentifiseer word nie en dit kan ook nie in sake van geloof en praktyk deur die staat beheer en gekontrolleer word nie. Die staat is verantwoordelik vir die administrasie van die Landswette, om wet en orde in die gemeenskap te verseker en die welvaart van die landsburgers te bevorder. Die Kerk is verantwoordelik om die Woord van God aan alle mense te verkondig en gehoorsaam te wees aan die owerhede in soverre dit in ooreenstemming met die Heilige Skrif is. (Joh. 18:36; Rom. 13: 1-7; 1 Pet. 2:13-17)

4.6 Ons glo dat God die huwelik slegs tussen ’n man en ‘n vrou ingestel het en daarom glo ons dat die huwelik ‘n heteroseksuele verhouding tussen ‘n natuurlike man en ‘n natuurlike vrou, binne die bepalings van ‘n wettige huweliksluiting is en dat homoseksuele verhoudings onaanvaarbaar en ‘n gruwel in die oë van God is. (1 Kor. 7; Ef. 5:22; Rom. 1:24-32)

5. DENOMINASIONELE AFFILIASIE EN GEMEENSKAP MET ANDER CHRISTENE

5.1 Die Kerk onderskryf die konstitusie en is ‘n aktiewe lid van die Afrikaanse Baptiste Kerke.

5.2 Die bestuur van die gemeente sal in ooreenstemming met die fundamentele beginsel van die selfversorging van die lokale gemeente, volgens 5.1 geskied (Hand. 20:28)

5.3 Die Uitvoerende Komitee van die Afrikaanse Baptiste Kerke word gemagtig om in oorleg met die ouderlinge van die gemeente enige sake van wanbestuur, wangedrag of geloof afwyking te ondersoek. (Hand. 15:2; 1 Tess 5:14)

5.4 Die Kerk sal daarna strewe om gemeenskap te handhaaf, en met ander ooreenstemmende kerke en groepe saam te werk in soverre dit met Bybelse beginsels en lering ooreenstem. Dit sluit dus skrif kritiese en liberale predikante uit.

5.5 Die gemeenskap sal uitdrukking vind in gereelde praktiese aksies soos kansel uitruilings, gebed briewe, bywoning van vergaderings en kursusse, wedersydse hulpverlening en ander praktiese maniere van eenheid soos in die Skrif bepaal.